ජාත්‍යන්තර ඔලිම්පික් කමිටුවේ විධායක මණ්ඩලය විසින් රුසියානු ඔලිම්පික් කමිටුව වහාම ක්‍රියාත්මක වන පරිදි අත්හිටුවා ඇති බව විදෙස් මාධ්‍ය පවසනවා.
2022 වර්ෂයේදී එහි පූර්ණ පරිමාණ ආක්‍රමණය ආරම්භ වූ දා සිට රුසියාව විසින් නීතිවිරෝධී ලෙස ඈඳාගත් යුක්‍රේනයේ Luhansk, Donetsk, Kherson සහ Zaporizhzhia යන ප්‍රදේශ හතරක් කලාපීය සංවිධාන ලෙස රුසියානු ඔලිම්පික් කමිටුව (ROC ) විසින් පිළිගැනීමෙන් පසු මෙම පියවර ගෙන ඇති බවයි වාර්තා වන්නේ.
යුක්‍රේනයේ ජාතික ඔලිම්පික් කමිටුවේ භෞමික අඛණ්ඩතාව උල්ලංඝනය කරන බැවින් එය ප්‍රඥප්තිය උල්ලංඝනය කිරීමක් බවද ජාත්‍යන්තර ඔලිම්පික් කමිටුව (IOC) සඳහන් කළා.
තවද අත්හිටුවීම යන්නෙන් අදහස් වන්නේ රුසියානු ඔලිම්පික් කමිටුවට ජාතික ඔලිම්පික් කමිටුවක් ලෙස ක්‍රියා කිරීමට තවදුරටත් හිමිකම් නැති බවයි.
එමෙන්ම ඔලිම්පික් ව්‍යාපාරයෙන් කිසිදු අරමුදලක් ලබා ගැනිමටත් ඔවුන්ට හැකියාවක් නොමැති බව සඳහන්.
රුසියානු ක්‍රීඩක ක්‍රීඩිකාවන්ට 2024 දී පැරිසියේදී මධ්‍යස්ථ ලෙස තරග කළ හැකිද යන්න තීරණය කරන බවද ජාත්‍යන්තර ඔලිම්පික් කමිටුව වැඩිදුරටත් සඳහන් කරනවා.
